Cui diversum Ἀττικὴ Μοῦσα, id est Attica Musa pro venusta lepidaque oratione. Nam inter dicendi genera laudatur in primis Atticum. Diogenes Laertius et Plutarchus in vita Platonis scribit id cognominis vulgo tributum fuisse Xenophonti, ut Attica Musa vocaretur propter admirabilem quandam hominis in dicendo venustatem. Unde et Atticam eloquentiam et Atticum leporem appellant, quemadmodum indicavimus alibi. Sed ad hominem accommodatum erit venustius, praesertim si accedat ironia, veluti si inelegantem aliquem et ab omnibus literis et gratiis alienissimum Atticam Musam voces. Nam amusi vocantur omneis hujusmodi.