Huic simillimum est illud Latinorum adagium De lana caprina, quod a simili quopiam eventu natum apparet, contentiose decertantibus duobus, utrum lanas haberet caper an setas. Aut alioqui de villis caprinis dimicantibus, re videlicet inutili minimique momenti, cujusmodi jocus fertur et de asini lana. Horatius in Epistolis ad Lollium :
Loquitur de morosis in amicitia, qui quantumlibet frivola de causa litem cum amico suscipiunt.Alter in obsequium plus aequo pronus et imi
Derisor lecti sic nutum divitis horret,
Ut puerum saevo credas dictata magistro
Reddere vel parteis mimum tractare secundas ;
Alter rixatur de lana saepe caprina,
Propugnat nugis armatus.