Μικρὸν τοῦ ὀβολοῦ τίμιον, id est Exiguum oboli precium. Suidas citat ex Maryca Eupolidis, convenire in homines nequam nihilique. Quanquam nihil obstat, quominus ad rem contemptam transferatur. Meminit et Eudemus. De similibus multa retulimus antea : obolaris homo, homo tressis, homo trioboli, homo vix dupondio aestimandus. Justinianus juvenes primum ad juris studium ingressos dupondios appellari voluit velut extremae classis. Nam qui jam profecissent, prolytas ac lytas appellavit quasi dimissos.