Bipedum nequissimus, de homine vehementer improbato quique vel pecudes nequitia superet. Dictum est in Regulum quendam oratorem, quem Plinius in Epistolis subinde suis pingit coloribus, ubi et adagium hoc refertur. Sed ante hunc Cicero torserat in Clodium in oratione Pro domo sua : Hoc tu proscriptore, hoc consiliario, hoc ministro, omnium non bipedum solum, sed etiam quadrupedum impurissimo rempublicam perdidisti. Consimili figura Alexander imperator apud Aelium Lampridium : Nuper certe, patres, meministis, cum ille omnium non solum bipedum, sed etiam quadrupedum spurcissimus Antonini nomem praeferret, Heliogabalum significans imperatorum unum omnium effeminatissimum et quem optimo jure Romanum Sardanapalum possis dicere. Addit autem in hoc sermone nominis generalitas gratam quandam et novam ἔμφασιν, quemadmodum et nullum animal pro nullo homine vulgo dicimus.