Non eras in hoc albo, hoc est Non eras in hoc numero. Translatum ab albata tabula, in qua quondam scribebantur nomina judicum. Plinius in praefatione Historiarum mundi : Cum hanc operam condicerem, non eras in hoc albo, id est non eras in eorum numero, quos haec lecturos credebam. Erat et album praetoris, in quo leges et formulae describebantur. Pandectarum libro primo titulo De edendo ex Ulpiano : Eum quoque edere Labeo ait, qui producat adversarium suum ad album et demonstret, quid dictaturus sis. Atque hoc sane loco adversarium non declarat eum, quicum lis est, sed tabulas ex tempore notatas memoriae gratia. In quem sensum M. Tullius usus est in oratione Pro Roscio idque non semel. Andreas Alciatus existimat legendum adversaria, non adversarium libro Dispunctionum tertio. Item secundo ejusdem operis libro, titulo primo multa fit mentio de albo. Quintilianus libro Institutionum XI : Quorum alii se ad album et rubricas transtulerunt videlicet leguleios et formularios irridens, qui non ex libris jurisprudentium, sed ex albo praetoris juris scientiam discerent. T. Livius decadis primae libro nono : Civile jus repositum in penetralibus pontificum evulgavit fastosque circa forum in albo proposuit, ut, quando lege agi posset, sciretur. Apuleius Metamorphoseos libro VI meminit albi. Siquidem Jovem adlocuturum deos ita facit exordiri : Dei conscripti Musarum albo. Quibus in verbis mihi subesse videtur obscura quidem, sed faceta allusio scriptoris ad deos a poetis confictos, quasi ii demum, in deorum numero sint, quos illic Musae, quibus afflati scribunt poetae, constituerint.