Qui vehementer ad aliquid natura compositi sunt, hos proverbiali sermone ad hoc natos, factos sculptosque dicimus. Insignem autem naturae dexteritatem M. Tullius eleganter expressit eodem libro : Sunt autem, inquit, quidam ita naturae muneribus in iisdem rebus habiles, ita ornati ut non nati, sed ab aliquo deo ficti videantur. Allusit autem ad Pandoram, quam finxit Vulcanus caeteris item diis sua munera in unam conferentibus.