Adagiorum Chiliades

IV. 10Fato Metelli.lxii

Asconius Pedianus in oratione Pro Milone refert Naevii poetae senarium jactatum in familiam Metellorum, quod consules designarentur arbitrio Fortunae, quae campi domina dicitur, verius quam suis meritis :

Fato Metelli Romae fiunt consules.

[Ad. Verr., X, 29] Ad id tum Metellus consul iratus respondit senario hypercatalectico, quem ait et Saturnium appellari :

Dabunt malum Metelli Naevio poetae.

Ad id tecte allusit M. Tullius, cum ait : Te non fato, ut caeteros ex nostra familia. Dictum facete et contumeliose in Metellos torqueri poterit in eos qui praeter meritum suum ad opes ac dignitates provehuntur.