Qui plus satis indulgent ventri gulaeque proverbiali joco jubebantur gallam bibere. Is est fructus sub autumnum adnascens arboribus, praecipue robori, specie rotundae nucis. De cujus natura multa prodiderunt Plinius, Dioscorides, Galenus ac Theophrastus. Vim habet astringendi exiccandique et ob id utilis ad multa. Inde illud Lucilianum, cum nepotes ac lurcones jubet gallam bibere et rugas inducere ventri, sentiens coarctandos esse ventres. Refert Sextus Pompeius Festus. Simile est Horatianum illud, cum scribit ventres nepotum inurendos candenti lamina.