Sunt et illae formae a jurisconsultis ductae versae in proverbium : ex syngrapha agere, obsignatis tabulis agere pro eo quod est : rigide parumque civiliter, sed velut ex obligatione. Cicero Pro Murena : Pergitisne vos tanquam ex syngrapha agere cum populo ? Syngrapha Latinis sonat conscriptionem, quod utriusque manu conscripta utrisque partibus tradi soleat. Et in hoc syngraphae differunt a tabulis, quod tabulae ab una parte tantum servari consueverint. A chirographo, tabulis, codicillis differt syngrapha, quod in illis non scribantur nisi acta, in hac etiam contra fidem actionis pactio venit, et non numerata pecunia aut non integre numerata pro temporaria voluntate hominum scribi solet. Ita propemodum Asconius Pedianus in Verrinarum tertiam.