Passis velis plenisque velis agere dicuntur qui toto impetu summoque conatu moliuntur aliquid. Ita M. Tullius Pro domo sua ad pontifices : Quid tandem ? si tu in illis reipublicae tenebris caecisque nubibus et procellis senatum a gubernaculis dejecisses, populum e navi exturbasses, ipse archipirata cum grege praedonum impudissimo plenis velis navigasses — si quae tum promulgasti constituisti promisisti vendidisti perferre potuisses, qui locus terrarum vacuus extraordinariis fascibus atque imperio Clodiano fuisset ? Hactenus Cicero. Philostratus in Polemone : Ἐπεὶ δὲ ἤκουσεν Εὐφράτου τοῦ Τυρίου, πλήρεσιν ἱστίοις ἐς τὴν ἐκείνου φιλοσοφίαν ἀφῆκεν, id est Posteaquam audivit Euphratem Tyrium, plenis velis ad illius philosophiam se contulit. De similibus figuris alias nobis non semel dictum est.