Scrupuli sunt minuti lapilli, qui inter ambulandum insiliunt in calceos hominis ac pedem torquent. Inde injicere scrupulum dicitur qui sollicitudinem injicit animo cujuspiam. Et scrupulum eximit qui sollicitudinem eximit. Terentius in Adelphis : Timet, injeci scrupulum homini. M. Tullius quarto De finibus, in fine disputationis : Scrupulum inquam abeunti ? Sed videbimus. Hoc non dissimile est illi, quod alias retulimus : Infixo jaculo fugere. Rursum Terentius in Andria :
At mihi unus etiam scrupulus restat, qui me habet male.