Proverbialiter haud dubie dixit Juvenalis : Sanior es pisce. Nam ad eum modum hodieque vulgo loquuntur : Tam sanus es quam piscis. Id inde sumptum est quod creditum est pisces non sentire morbos. Quanquam huic sententiae refragatur Aristoteles libro De natura animalium octavo atque hunc secutus Plinius libro nono. Siquidem aegrotare pisces hoc argumento colligunt piscatores, quod aliquoties inter ejusdem generis praepingues ac vegetos, aliquot capiunt extenuatos ac languentibus similes coloreque immutato. Quanquam universo piscium generi non incidit pestis, quemadmodum frequenter accidit hominibus ac caeteris animantibus, non cicuribus modo verum etiam feris.