Plutarchus in commentario Περὶ εὐθυμίας refert hujusmodi sententiam ceu vulgo jactatam, alioqui ipsa quoque figura proverbium prae se ferentem : Οὔτε ποδάγρας ἀπαλλάτει καλτίκιος οὔτε δακτύλιος πολυτελὴς παρωνυχίας οὔτε διάδημα κεφαλαλγίας, id est Nec podagra liberat calceolus nec preciosus anulus unguium vitio, quam παρωνυχίαν vocant, Latini reduviam, nec diadema capitis dolore. Plutarchus utitur ad hunc modum : si divitiae reliquaque fortunae munera non tollunt morbos corporis, quanto minus mederi possunt animi malis. Anulus insigne doctoris est, at is non tollit ingenii stuporem ; diadema regum insigne est, sed id non adimit homini stultitiam ; purpureus galerus eximiae pietatis insigne est verum nec is liberat ab impietate mentis.