Equidem non pugno esse proverbium, etiam si proverbii simillimum est illud epiphonema Senecae, libro Epistolarum undecimo : Et post malam segetem serendum est. Quo licebit uti quoties res parum ex animi sententia cecidit et significabimus non esse desistendum a conatu. Quanquam Seneca loquitur de iis qui refugiunt in ullum hominem beneficium collocare, quod semel inciderint in ingratum. Ejusdem generis est quod eodem subnectitur loco : Post naufragium maria tentantur.