Θερσίτειον βλέμμα, id est Thersitica facies. De prodigiose deformi dici solitum, quod Homerus scripserit hunc omnium qui ad Trojam venissent foedissimum fuisse. Ac totum hominem a capite, quod aiunt, usque ad pedes ita graphice depingit et corporis vitia et animi morbos ut dicas pessimum ingenium in domicilio se digno habitasse ; locus apud Homerum est Iliadis libro secundo notior quam ut hic referat adducere. Venustius erit si ad animum transferatur, veluti si de formoso, sed moribus improbo, dicas : Si corpus aspicias, Nireus est ; si animum, plusquam Θερσίτειον βλέμμα reperies. Adagii mentionem fecit Suidas.