Οὐκ ἔστι διθύραμβος ἂν ὕδωρ πίνῃ, id est
Non adest hilaritas, cum deest vinum ; languet poetarum ingenium, ni vino concalescat. Unde teste Flacco :Haud dithyrambus est, aquam si potitet.
Et :Laudibus arguitur vini vinosus Homerus.
Et :Ennius ipse pater nunquam nisi potus ad arma
Prosiliit dicenda.
Quin, ut refert in Symposiacis Plutarchus, Aeschylus tragoedias suas potando scripsit. Excitat enim vini calor inveniendi vim, quae torpet nonnunquam in jejunis, movet phantasias, addit impetus, subministrat fiduciam. Addit Gorgiam non recte suam tragoediam Marti tribuisse, cum Baccho magis sit adscribenda. Dithyrambi canebantur in honorem Bacchi, qui et ipse διθύραμβος dictus est, quod bis natus velut e duabus januis prodierit.Nulla placere diu nec vivere carmina possunt
Quae scribuntur aquae potoribus.