III. 7. Lucrum pudori praestat. xiv

Κέρδος αἰσχύνης ἄμεινον, id est Lucrum pudori praestat. Plautus in Pseudolo :

Nimio illud quod pudet facilius fertur quam illud quod piget.

Eundem sensum aliter extulit in Trinummo :

Pol pudere quam pigere praestat totidem literis.

Sententia bono viro indigna, eoque illic a lenone dicitur, hic a sene. Sed commode ad persuadendum sententiam etiam parum probam arripuit. Alioqui longe satius rei jacturam quam famae dispendium accipere. Huc allusit Terentius in Phormione :

Non te pudet vanitatis ? — Non, dum ob rem.

Quin et hodie vulgato proverbio jubent valere pudorem, ubi de pecuniaria re agitur. Plutarchus in commentario De audiendis poetis refert e poeta nescio quo senarios hos :

Τοῦ μὲν δικαίου τὴν δόκησιν ἄρνυσο,

Τὰ δ᾽ ἔργα τοῦ πᾶν δρῶντος, ἔνθα κερδανεῖς,

id est

Opinionem spernito justi ac virum

Quidvis agentem sequere, cum spes est lucri.

Refert et hunc ex Sophocle  :

Τὸ κέρδος ἡδύ, κἂν ἀπὸ ψευδῶν ἔῃ,

id est

Dulce est lucrum profectum et a mendaciis.