Μερὶς οὐ πνίξ, id est Sortitio non praefocatio. Olim cum ii, qui viribus praepollerent, cibum eriperent imbecillioribus manus interim in illos injicientes, excogitatum est, ut sortibus ex aequo divideretur epulum, jamque ab omnibus acclamari coeptum : Μερὶς οὐ πνίξ, id est Partitio non strangulatio, eaque voc in proverbium abiit. Quo licebit uti, si quando significabimus non esse locum violentiae, sed ex aequitate juris oportere tractari negotium. Plutarchus in collectaneis, si modo illius sunt, citat his verbis : Μερὶς οὐ μὴ πνίγει, id est Partitio est, non strangulat. Admonet et Suidas hac forma proverbium efferri.