Τῇ χειρὶ δεῖ σπείρειν, ἀλλὰ μὴ ὅλῳ τῷ θυλάκῳ, id est Manu sementem facere oportet, non autem tota corbe. Dictum Corinnae ad Pindarum poetam, ut auctor est Plutarchus in commentario quem inscripsit Πότερον Ἀθηναῖοι κατὰ πόλεμον ἢ κατὰ σοφίαν ἐνδοξότεροι. Modus in omni re servandus et pedetentim ab aliis ad alia transeundum. Ab agricolis ductum est : qui cum serunt, non semel effundunt ipso vase, sed manu rara spargunt semina, ut universo arvo occupando sufficiant. Ad eundem modum ita dispensanda est benignitas ut multis suppeditare possis. Ita moderandus est labor in literis ut ad alia quoque vitae munia suppetat animi vigor.