Ἐκ βραδυσκελῶν ὄνων ἵππος ὤρουσεν, id est E tardigradis asinis equus emersit. Cum clarus evadit quispiam obscuro genere natus aut quoties ab indocto praeceptore proficiscitur discipulus eruditus. Potest et per ironiam proferri et per negationem, ut Nunquam ex asinis nascetur equus et En tibi ex asinis equum, id est ex infimis parentibus arrogantem et ferocem. Huic contrarium est quod alibi retulimus : Heroum filii noxae, cum ex egregiis viris prognati non respondent majorum virtutibus, quemadmodum Socrates apud Platonem in Alcibiade priore docet ambos Periclis filios Paralum et Xanthippum fuisse stupidos, Cliniam evasisse furiosum, denique nullum illius opera factum sapientem, cum Zenonis consuetudine multi sapientes evaserint. Idem tractat in Menone commemorans et Aristidem, qui filium habuit Lysimachum nullius rei, praeterea Thucydidem, cui duo fuerint filii, Melesias et Stephanus ; neuter respondit virtuti paternae. His addi poterat M.Tullius, qui filium reliquit illaudatum et a patriis virtutibus plurimum degenerantem.