Ἀξία ἡ κύων τοῦ βρώματος, id est Digna canis pabulo. Ferme perinde valet ac si dicas : Dignus operarius mercede sua. Et vix quisquam est tam inutilis minister, quin si non amplo salario, certe victu dignus esse videatur. Refertur a Suida. Quadrabit in hominem non usquequaque rejiciendum atque inutilem aut in hominem assentatorem et ob id idoneum qui versetur in principum aulis, ubi nullo in precio sunt qui nesciant adulari.