Ἀγαθώνιος αὔλησις, id est Agathonia cantio, recte dicitur de oratione blanda magis quam frugifera. Agathon tibicen quispiam erat, cantilenarum suavitate majorem in modum aures deliniens. Nec hujus mores dissimiles musicae fuisse perhibentur. Laboravit enim infamia mollitiei. Auctor et Suidas et Zenodotus. Haud scio, an hic sit idem ille Agathon in tragicorum certamine victor, in cujus epiniciis Plato celebrat illud nobile convivium. Hujus multis modis Aristophanes in Thesmophoriis carminum mollitiem deridet.