Κερκυραία μάστιξ, id est Cercyraeum flagrum. De re supervacaneo cultu exornata. Quadrabit et in ea, quibus ornatus additur neutiquam decorus aut congruus. Cercyraeis, quoniam crebris seditionibus agitabantur, mos erat gestare flagra ingentia, ansis eburneis exornata. Quidam aiunt ea duplicia fuisse. Itaque in proverbium abierunt. Auctor interpres Aristophanis in Aves. Lycurgus rhetor, cum ob immodicam linguae libertatem e contione ejiceretur, exclamavit : Ὦ Κερκυραία μάστιξ, ὡς πολλῶν ταλάντων ἀξία εἶ, id est o Cercyraea scutica, quam multa vales talenta, notans populum inutilem, magno tamen alendum. Refert Plutarchus in Vita decem rhetorum.