II. 2. Minus habes mentis, quam Dithyramborum poetae. xxxi

Διθυραμβοποιῶν νοῦν ἔχεις ἐλάττονα, id est

Minus sapis scriptoribus dithyrambicis.

In stupidos ac furiosos torquetur. Adagium annotatur ab Aristophanis interprete in Avibus. Sumptum a poetis dithyrambicis, qui Baccho afflati furebant. Unde et Horatius :

Aut insanit homo, aut versus facit.

In Odis, Pindari grandiloquentiam attollens :

Seu, inquit, per audaces nova dithyrambos

Verba devolvit numerisque fertur

Lege solutis.

Philostratus in Sophistis immoderatam in dicendo vehementiam ac granditatem aliquoties appellat τὸ διθυραμβῶδες eosque dicit ἐκβακχεύειν καὶ ὑπερβακχεύειν.