Quod si juxta proverbium Δύσκολα τὰ καλά eaque vulgo ceu vilia fastidiuntur quaecumque facilia videntur (ut de me interim nihil dicam quantis sudoribus opus hoc mihi constiterit), ne quisquam arbitretur usqueadeo proclive vel intelligere vel sermoni paroemiam intexere. Siquidem ut non mediocris est artificii gemmulam scite includere anulo et aurum purpurae intertexere, ita non est, mihi crede, cujusvis paroemiam apte decenterque orationi inserere. Quodque Fabius scribit de risu nihil affectari periculosius, idem de proverbio non injuria dixeris. Etenim in hujusmodi, quemadmodum et in musica, nisi summum praestes artificem, ridiculus sis ; et aut laudem eximiam aut risum auferas oportet.