M. Tullius in catalogo illustrium oratorum figura, mirum ni proverbiali, dicit de fece haurire pro eo, quod est sordida quaepiam ac plebeia nimisque humilia persequi. Usurpat hoc proverbium Atticus eo, quo dixi libro, in Ciceronem, qui tempus tereret in commemorandis oratoribus quibusdam obscuris ac nullius poene nominis. Mutuo sumptum a sordidis istis, qui vinum una cum ipsa fece hauriunt, ne quid omnino reliquuum faciant in dolio, unde et plebis infimam fecem dicimus.