Quem summo praemio dignum Graeci significant, ei dicere solent Aureus in Olympia statuere. Lucianus in Pseudologista : Χρυσοῦς, φασίν, ἐν Ὀλυμπίᾳ στάθητι, id est Aureus, ut aiunt, in Olympia stato. Quod is honos id aetatis praecipuus haberetur, loco tam celebri statuam inter illustres viros habere. Huc allusit Vergilius, cum ait :
Plato in Phaedro : Ὑπισχνοῦμαι χρυσῆν εἰκόνα ἰσομέτρητον εἰς Δελφοὺς ἀναθήσειν, id est Polliceor me statuam auream tibi aequalem Delphis collocaturum. Ibidem paulo post : Παρὰ τῶν Κυψελιδῶν ἀνάθημα σφυρήλατος ἐν Ὀλυμπίᾳ στάθητι, id est Inter statuarum Cypselidarum monimenta in Olympia fabrefactus stato. Interpres fortassis χρυσήλατος legit aut certe somniavit, ut qui verterit aureum. Porro reges Corinthi dicuntur Cypselidae a Cypselo, qui pulsis Bacchidis e Corintho ibidem imperio est potitus summasque coegit divitias ; cujus rei argumentum inquit Strabo τὸ Ὀλυμπίασιν ἀνάθημα Κυψέλου σφυρήλατος χρυσοῦς ἀνδριὰς εὐμεγέθης. Allusit huc et Philostratus in Apollonii vita : Καὶ στεφανώσουσί σε ἐν Ὀλυμπίᾳ, id est Et coronabunt te in Olympia. Non dissimili figura dixit Persius satyra secunda :Si fetura gregem suppleverit, aureus esto.
Quibusdam enim signis aurea barba consuevit addi.Praecipui sunto sitque illis aurea barba.