Adagiorum Chiliades

IV. 9Commovere sacra.lvi

Plautus in Pseudolo commovere sacra dixit pro eo quod erat extrema experiri praesidia. Hinc dictum apparet, quod rebus desperatis soleant homines ad deorum praesidia confugere, velut hodie Lutetiae, cum supra modum inundat Sequana, corpus divae Genovefae a montis Acuti templo defertur ad aedem Virgini Matri sacram. Sed vide, num pro sacra legendum sit saga, ut intelligas arma, de quo jam diximus. Sequitur enim protinus :

Quo pacto et quantas soleam turbellas dare.

[Pseud.] Deinde verba sunt quasi bellum denuntiantis :

Nunc, ne quis dictum sibi neget, dico omni pube

Praesente in contione, omni populo,

Omnibus amicis notisque edico meis,

In hunc diem a me ut caveant, ne credant mihi.

[Pseud.] Idem servus et deinceps bellica loquitur.