Apud jurisconsultos proverbiale est nummo addicere pro eo quod est minimo vendere. Est autem fucus quo legibus imponitur prohibentibus donationes. Ulpianus libro Pandectarum XIX, titulo Locati : Si quis conduxerit nummo uno, conductio nulla est, quia et hoc donationis instar inducit. Idem libro primo, titulo De re judicata : Si quis et conduxit et rogavit precario uti possideret, si quidem nummo uno conduxit, nulla dubitatio est quin et precarium solum teneat. Verum addubito num in his exemplis pro conduxit et conductio legendum sit condixit et condictio. Suetonius in Julio Caesare : Bello civili super alias donationes amplissima praedia nummo addixit. Valerius Maximus libro II, capite De gratitudine : Pollinctoribus exequiarum apparatus sestertio nummo ipsis praebentibus est addictus. Itidem Plautus in Pseudolo : Nunquam hoc eris nummo divitior. Nummum dixit pro vilissimo precio.