Αὐτοῖς καὶ Χίοις : non obscurum est has voces ex sollemni more vulgo jactatas, quoties aliquis sibi bona precabatur et amicis. Sic enim precatur apud Aristophanem avis : Διδόναι Νεφελοκοκκυγιεῦσιν ὑγίειαν καὶ σωτηρίαν αὐτοῖσι καὶ Χίοισι, id est Ut detis Nephelococcygiensibus bonam valetudinem et incolumitatem ipsis et Chiis. Interpres ostendit hunc sermonis colorem ductum ex publica Atheniensium consuetudine, qui in sollemnibus comprecationibus ac sacrificiis bona a diis precantes reipublicae addebant : καὶ Χίοισιν, atque hujus historiae testem citat Theopompum in duodecimo libro Rerum Philippicarum — opinor, quod e Chio nonnullam haberent Athenienses commoditatem. Qui sibi uni bene precatur nulla facta mentione amicorum aut bene meritorum, facere succinetur : καὶ Χίοισιν.