Herodotus in Melpomene, hoc est libro quarto, refert. Cum Theres quidam adornaret longinquam navigationem ac filius ipsius adulescens negaret se futurum ejus navigationis comitem, Τοιγαροῦν ἔφη αὐτὸν καταλείψειν ὄιν ἐν λύκοισι, id est Itaque relinquam eum, inquit, ovem inter lupos. Ex eo dicto nomen inditum est adulescentulo Οἰόλυκος, voce composita ex ove et lupo. Dici poterit in hominem desertum ac destitutum auxilio. Quod si quis negabit hoc esse proverbium, patiatur appendicem esse ejus quod alibi retulimus, Ovem lupo commisisti ; nam probabile est hac historia natum proverbium.