IV. 6. Non incedis per ignem. xxxii

Οὐ γὰρ ἐπὶ πυρὸς βέβηκας : Non incendis per ignem. Theocritus in Hodoeporis :

Μὴ σπεῦδ᾿· οὐ γάρ τοι πυρὶ θάλπεο,

id est

Ne propera : neque enim igne calescis.

Scholiastes indicat subesse proverbium, quo significabant aliquem plus satis festinare. Nam pastor, ut erat, protinus volebat canendi certamen inire. Alter non probans tantam celeritatem provocat ad locum commodiorem. Properant enim qui per ignem incedunt et celeritas reddit elementum innoxium, quemadmodum non laeditur qui manum per mediam flammam mittit aut prunam ardentem subito manu correptam abjicit. Qui versatur in re periculosa dicitur et ipse per ignem incedere, de quo prius nobis dictum est.