Divus Hieronymus adversus Rufinum respondens : Quomodo eorum praefationes librorum quos nescias accuses, quae quodam vaticinio futurae calumniae responderunt, implentes proverbium Prius antidotum quam venenum, subaudi adhibes. Conveniet uti quoties aliquis se purgat antequam accusetur. Antidotus enim adversus venena datur ; hanc nemo sumit nisi gustato veneno. Quanquam sunt qui se praemuniant antidotis, ne noceat si fors contingat sumere toxicum ; quemadmodum fecisse legimus Mithridatem.