II. 10. Multi te oderint, si teipsum amas. xxvi

Πολλοί σέ τοι μισοῦσιν, ἂν σαυτὸν φιλῇς, id est

Multi oderint, si temetipse diligas.

Deterret a fastu proverbium et a philautia ; multis enim displiceat oportet qui sibi nimium placet, contra modestia praecipua favoris et benevolentiae conciliatrix. Suidas ait nymphas fastiditas a Narcisso hoc dixisse, quod modo retulimus. Concinit huic senarius ille :

Λίαν φιλῶν ἑαυτὸν οὐχ ἕξεις φίλον,

id est

Nemo erit amicus, ipse si te ames nimis.

Nulli minus sunt appositi ad mutuum amorem ac benevolentiam quam qui sese vehementer amant.