Ἑκὼν ἀέκοντί γε θυμῷ, id est Volens invito sane animo. Hemistichium Homericum Iliados libro quarto. Dicendum, ubi quis fingit se nolle quod cupit aut contra. Terentius non dissimili figura dixit in Andria : Tu voluntate coactus es tua. Nonnunquam de ambigente animique incerto dicitur, ut apud Euripidem in Hecuba : Ὁ δ᾿ οὐ θέλων τε καὶ θέλων, id est At is volensque et non volens. Est etiam in arcanis proverbiis Hebraeorum pigrum velle et non velle.