Rem eandem alia reddunt metaphora, cum aiunt paupere vena, benigna vena, divite vena. Venam autem appellant indolem et vim genuinam ingenii, translatione ducta vel a fontibus, quorum alii angustiore vena manant, alii tanta, ut flumen ingens efficiant, vel a metallis, quorum etiam venae non genere tantum, sed et copia differunt. Simillimum his est quod ait Quintilianus libro undecimo : Pleniore tamen haec canali fluunt : Vos, Albani tumuli atque luci.