I. 10. Corpus sine pectore. lxxx

Proverbiali figura dixit Horatius in Epistolis ad Albium :

Non tu corpus eras sine pectore ; dii tibi formam,

Dii tibi divitias dederant artemque fruendi.

Item Ovidius in Heroinis :

Hunccine tu speras hominem sine pectore dotes

Posse satis formae, Tyndari, nosse tuae ?

Perinde vero dictum est corpus sine pectore, quasi dicas sine mente. Nam sapientiam et ingenium in pectore atque in corde constituunt. Unde et cordatos appellamus prudentes. Et Juvenalis tardum ac stolidum significans Cum laeva in parte mamillae / Nil salit Arcadico juveni.