Adagiorum Chiliades

I. 10Quocumque pedes ferent.lxviii

Ἔνθ᾿ ἂν οἱ πόδες φέρωσιν, id est Quocumque ferant pedes, pro eo, quod est quovis. Quadrabit ubi nihil certum spectatur, ad quod nostri dirigantur conatus. Lucianus in Hermotimo : Οὐδὲ τοῦτο δὴ τὸ τοῦ λόγου ποιήσομεν, ἔνθ᾿ ἂν ἡμᾶς οἱ πόδες φέρωσιν, ἐκεῖσε ἄπιμεν, [Hermot.] id est Neque juxta proverbium, quocumque nos pedes tulerint, illuc ibimus. Horatius in Epodis :

Ire pedes quocumque ferunt, quocumque per undas

Notus vocabit aut protervus Africus.

[Epod., 16, 21] Rursus in Odis :

I, pedes quo te rapiunt et aurae.

[Carm., III, 11, 49] Ita et Theocritus in Hyla :

Ἇι πόδες ἆγον ἐχώρει,

[Idyll., 13, 70] id est

Ducebant quocumque pedes ibat.

Rursus in Thalysiis :

Πᾷ δὴ τὺ μεσαμέριον πόδας ἕλκεις;

[Idyll., 7, 21] id est

Quo tandem te quaeso pedes medio trahis aestu ?

Et Vergilius :

Quo te, Moeri, pedes, an quo via ducit in urbem ?

[Buc., 9, 2] Nec dissimili forma Plato libro De republica tertio : Ἀλλ᾿ ὅπῃ ἂν ὁ λόγος ὥσπερ πνεῦμα φέρει ταύτῃ ἰτέον, [Rep.] id est Sed quocumque ratio ceu ventus tulerit, hac eundum est.