Adagiorum Chiliades

I. 10Eodem cubito.xlii

Αὐτῷ πήχει, id est Eodem cubito, hoc est eadem regula, eadem mensura. Utitur hoc aliquoties Lucianus cum alias tum in libello De ratione conscribendae historiae : Καὶ ὅλως πῆχυς εἷς καὶ μέτρον ἀκριβές, [Conscr. hist.] id est In summa cubitus unus atque exacta regula. Aristophanes in Ranis :

Καὶ γὰρ ταλάντῳ μουσικὴ σταθμήσεται

Καὶ κανόνας ἐξοίσουσι καὶ πήχεις ἐπῶν,

[Ran.] id est

In lance enim librabitur poetica

Promentque regulas cubitosque carminum.

Non dissimili figura dixit Cornelius Tacitus libro De oratoribus in praefatione, cum ait se quae a praestantissimis viris acceperat, iisdem numeris iisdemque rationibus persequi velle. Plinius Epistolarum libro VIII dixit pari libra. [Epist.] Illud fortasse παρεργότερον, at non inutile fuerit admonere plerasque metaphoras a mensuris ductas esse proverbiales ut pensiculare rem, pensitare factum, rependere beneficium, remetiri gratiam, librare negotium, expendere causam, renumerare beneficium, aequilibrium officii, retaliare convicium atque id genus alias.