I. 9. Ut canis e Nilo. lxxx

Qui leviter ac velut obiter artem quampiam aut auctorem degustant, hi ceu canis e Nilo degustare dicentur. Id adagii natum est ex apophthegmate quodam, cujus meminit Macrobius Saturnalium libro secundo. Id est hujusmodi : Post fugam Mutinensem quaerentibus quid ageret Antonius, quidam familiaris ejus respondit  : quod canis in Aegypto : bibit et fugit. Nam in illis regionibus constat canes raptu crocodilorum exterritos bibere et fugere. Solinus ait eos non nisi currentes lambitare, ne deprehendantur.

Index Adagiorum