I. 1. Faber compedes quas fecit, ipse gestet. lxxxvi

Ausonius in Trochaicis suis Terentiano proverbio confine quoddam subnectit et poetae metaphoram altera quadam interpretatur metaphora :

Tu molestus flagitator lege molesta carmina

Tibi quod intristi, exedundum est sic vetus verbum jubet,

Compedes, quas ipse fecit, ipsus ut gestet faber.

Competit in eos, qui sibi ipsis auctores sunt malorum. Videtur autem e Theognide poeta sumptum, qui ait :

Οὔτις ἀνήρ, φίλε Κύρνε, πέδας χαλκεύεται αὑτῷ,

id est

Vincula nemo sibi cudit carissime Cyrne.

Huic simile quiddam, humilius quidem, sed tamen aptum vulgo dicitur : Flagellum ipse paravit, quo vapularet. Idque sumptum a pueris aut servis, qui coguntur aliquoties ipsi parare virgas quibus vapulent.

Index Adagiorum