I. 9. Atticus aspectus. xlii

Ἀττικὸν βλέπος, id est Atticus aspectus, perinde est quasi dicas : os impudens. In eos dicebatur, qui vultu ipso prae se ferebant impudentiam dicendique confidentiam. Nam hoc vitio notati sunt Atticorum mores. Aristophanes in Nubibus :

Ἐπὶ τοῦ προσώπου τ᾿ ἐστὶν Ἀττικὸν βλέπος,

id est

Ac vultu in ipso aspectus Atticus eminet.

Sic enim loquitur Strepsiades de filio Socratica e schola redeunte, quem ex ipsa fronte conjicit malam causam agere posse, quod nescio quid Atticae astutiae simul atque impudentiae praeferret. Quin et Achilles apud Homerum Agamemnonem appellat κυνώπην ob impudentiam. Tales et κυνοβλῶπας dici admonet Hesychius.

Index Adagiorum