I. 8. Litem movebit, si vel asinus canem momorderit. xcviii

Celebratur Graecis et hic senarius proverbialis :

Δίκην ὑφέξει κἂν ὄνος δάκῃ κύνα,

id est

Litem movebit, si vel asinus mordeat canem.

Quadrabit in eos, qui de re quantumvis exigua litem suscitant. Natum videtur ab eventu quopiam. Extat autem apud jureconsultos actio ex lege, si quadrupes damnum dederit. Refertur a Zenodoto et Suida, quanquam apud utrumque scriptum est μακροῖς pro μικροῖς, quorum hoc mihi videtur sensus exposcere.