Adagiorum Chiliades

I. 8Frontem exporrigere, frontem contrahere.xlviii

Frontem explicare cum hilarescimus, contrahere cum ringimur, hoc est, ubi quid molestum est, dicimur. Plinius in libro undecimo : Frons et aliis, sed homini tantum tristitiae, hilaritatis, clementiae, severitatis index. [Hist. Nat., XI, 138] Terentius : Exporge frontem. [Adelph., 839] Horatius in Odis :

Sollicitam explicuere frontem.

[Carm., III, 29, 16] Idem alibi : Deme supercilio nubem. [Epist., I, 18, 94] Exporrecta fronte, hilariter : Porrectiore fronte mecum loquaris oportet apud Plautum. Obducta fronte, corrugata fronte, contracta fronte, caperata fronte. Plautus : Caperat frons severitudine. [Cas., 281] Quod quidem a caprinis cornibus translatum volunt. Et nubila frons, serena frons, explicita frons.