I. 8. Graeca fide. xxvii

Ἑλληνικῇ πίστει, id est Graeca fide, reperitur pro certa item fide. Fortassis idem cum proximo, nisi malumus per ironiam accipere. Ausonius ad Paulum :

Nobiscum invenies κατενόπλια, si libet uti

Non Poena, sed Graeca fide.

Idem de Philone villico suo :

Mutuatur ad Graecam fidem.

Plautus Graecam fidem dixit, ubi non verbis neque stipulationibus, sed praesente pecunia res agitur. Sic enim apud eum loquitur Clareta lena in Asinaria :

Diem, aquam, solem, lunam, noctem, haec argento non emo.

Cetera quae volumus uti, Graeca mercamur fide.

Id est numerata pecunia. Euripides in Iphigenia Taurica :

Πιστὸν Ἑλλὰς οἶδεν οὐδέν,

id est

Graecia nequaquam novit fidem.

Hoc sane nomine ea natio pessime audiit olim.