Adagiorum Chiliades

I. 1Coturnix Herculem.lxxi

Ὄρτυξ ἔσωσεν Ἡρακλῆν τὸν καρτερόν,

id est

Servavit Herculem coturnix strenuum.

Senarius est Graecis proverbii vice celebratus, quem tamen Zenodotus negat apud ullum veterum scriptorum inveniri. [Coll., 5, 56] Caeterum dici solitum de his, qui in periculo servati essent ab his, a quibus minime sperarant. Adagionis originem ad hujusmodi fabulam referunt : Coturnicem quandam Herculi in deliciis fuisse, cujus nidore cum viva incenderetur, ille mortuus sit in vitam restitutus. Meminit hujus fabulae Athenaeus quoque libro nono scribens : Herculem Jovis et Asteriae filium in Libyam proficiscentem a Typhone fuisse interemptum, revocatum autem in vitam odore coturnicis illi ab Iolao admotae, et ob eam causam Phoenices Herculi coturnice sacrificare. [Deipn., IX, 392d]