I. 8. Vitiosa nuce non emam. viii

Apud Plautum est in Milite : Vitam tuam vitiosa nuce non emam, pro eo quod est ne minimo quidem. Et vulgo dicimus Cassa nuce non emerim, et Putamine nucis non emerim. Aristophanes in Pace :

Οὐκ ἂν πριαίμην οὐδ᾿ ἂν ἰσχάδος μιᾶς,

id est

Non emerim nec unica quidem nuce.

Consimile his, quod legitur apud eundem Plautum citante Festo :

Non ego istud verbum empsitem titivillitio.

Nam hoc verbo Latinos nihili rem significare solitos quemadmodum et Graeci dicunt πιπολό. Rursum butubata, qua voce usus est Nevius pro nugatoriis auctore Festo.