I. 7. In silvam ligna ferre. lvii

In silvam ligna ferre est aliquem iis rebus augere velle, quibus ipse maxime abundet. Horatius in Sermonibus :

Atque ego cum Graecos facerem natus mare citra

Versiculos, vetuit me tali voce Quirinus

Post mediam noctem visus, cum somnia vera :

In silvam non ligna feras insanius ac si

Graecorum malis magnas implere catervas.

Eadem ratione dicimus : In mare deferre aquam, quorum utrumque nos in epigrammate quodam conjunximus,

Largiri numeros tibi, Petre, hoc est

Silvae ligna, vago mari addere undas.

Utrumque congruit cum eo, quod alio retulimus loco, Ululas Athenas.