Κάθαμμα λύειν, id est Nodum solvere, dicebatur qui negotium alioqui impeditum facile conficeret. Natum hinc aiunt, quod tradunt Midam curru nodis quibusdam inexplicabilibus e corni libro connexo vectari solitum. De hoc in templo reposito proditus erat apud Phrygas rumor, ut qui vinculum illius soluisset, eum Asiae imperio potiturum. Alexander Magnus explicuit exempto clavo, qui jugum temoni connectebat ; quidam aiunt gladio dissecuisse. Cujus historiae alio loco mentionem faciemus in proverbio Herculanus nodus. M. Tullius Epistolarum ad Atticum libro quinto : Caesari nullus honos a senatu habeatur, dum hic nodus expeditur, id est dum hoc negotium conficitur.