Idem diversa explicuit metaphora Persius satyra sexta : Messe tenus propria vive, id est Sumptum facito pro modo facultatum tuarum. Ab agricolis traductum, qui sumptus annuis agrorum proventibus metiuntur. Neque enim res consistere potest, cum quaestum superat sumptus, quemadmodum ait Plautus. Ostentatorem divitiarum elegante verbo Alexis apud Athenaeum libro sexto πτωχαλαζόνα dixit, eodem verbo declarans fastum cum paupertate conjunctum. Nunc mundus hoc hominum genere plenus est, qui plusquam tyrannicum fastum cum paupertatis professione conjungunt.